بحبك يا مني ......... مش وقت حب ده يا احمد

النهارده هنشوف حاجه غريبه اوي هي حياه المتزوجين

تعالي نتابع حياه احمد و مني اتنين بيحبوا بعض زي اي اتنين

في البدايه يتعرفوا علي بعض و يحبوا بعض و الحوار بينهم يبقي كالاتي

احمد:اذيك يا حبيبتي عامله ايه يا روحي
مني:انا الحمد لله يا حبيبي و انت؟
احمد:انا تمام يا حبيبتي و الله بفكر فيكي طول ما انا صاحي و بحلم بيكي و انا نايم
مني:بجد يا احمد؟ انا كمان و الله حلمت بيك امبارح

و تستمر بقي كلمات الحب و الغزل و انتي حبيبتي و انتي حياتي و انتي و انتي و انتي و هي انت اغلي ما عندي و انت و انت و انت و يبقي الاتنين مش عارفين يعملوا ايه علشان يسعدوا بعض

الحياه تمام لحد دلوقتي يجي البيه يتقدم لمني و يتخطبوا و تحصل مشاكل علي العفش و الفلوس و ضغط المصاريف و لكن جوارهم يبقي كده

احمد:اذيك يا حبيبتي
مني:انا بخير يا احمد انت عامل ايه انا عارفه و الله الضغوط عليك كتير اوي
احمد:يا حبيبتي طول ما انا معاكي مفيش حاجه تضغطني ابدا و كفايه تشجيعك لي

يا واد يا احمد يا جامد انت ايه يا واد الحب ده لا حبيبه بجد يا واد انت و هي و تمر الايام و احمد يجوز مني تعالوا بقي نشوف حياتهم هتمشي ازاي (بس من غير تريقه)

في اول شهر الحياه تمام و الدنيا زي الفل و بعدين مني تحمل و احمد حبه ليها يزيد و تخلف مني و يبدا حوارهم كالاتي

احمد صاحي من نومه لسه

احمد:مني يا مني اصحي
مني:ايوه يا احمد عايز ايه
احمد:قومي اعمليلي افطر علشان انزل الشغل
مني:يا احمد حرام عليك ابنك مسهرني طول الليل مش عرفت انام و دلوقتي تقولي قومي روح كل اي حاجه
احمد:ما انتي عارفه انا مش بعرف اعمل اي حاجه
مني:عندك جبنه و عيش كل
احمد:كل يوم كده؟
مني:اعملك ايه بقي انت عايز تتخانق علي الصبح و لا ايه ما قلنا ابنك مسهرني

احمد ياخدها من اصرها و يخرج من غير اكل ما هو زهق يا عيني من الجبنه و العيش و يروح احمد الشغل و يرجع مشتاق لحبيبته

احمد خبط محدش فتح خبط تاني محدش فتح راح فاتح الباب يشم ريحه قنبله بصل رهيييييبه يدخل المطبخ و بقف في زهول تااااااااااااااااام
يلاقي حبيبته الي حبها و بيتباهي بجمالها واقفه ادامه محاطه بقشر البصل و الطبيخ و شعرها و لا كانها ضرباه في خلاط و بتعمل الاكل

احمد:اذيك يا حبيبتي
مني:الحمد لله روح شيل الواد عقبال ما اخلص الاكل
احمد:حاضر يا حبيبتي

مني تعمل الاكل و ياكلوا يشتاق احمد لخروجه مع حبيبته

احمد:مني
مني:نعم
احمد:ما تيجي نخرج شويه يا حبيبتي
مني:نخرج نروح فين يا احمد ؟
احمد:نخرج نروح حته رومانسيه زي زمان
مني:ياه يا احمد وقتك ده انا تعبانه من الصبح انا داخله انام

و تنام مني واحمد ياكل و يتفرج علي التليفزيون و ينام و يصحي يروح الشغل و هكذا

نشوف اتنين تاني علي و مها لكن دول العكس تماما
مها رومانسيه اوي لكن علي يجي من الشغل علي 5 تعبان كالعاده ينام يصحي 10 ياكل و ينام تاني يصحي يروح الشغل و هكذا حتي ميعرفش ولادجه في سنه كام و لا في مدرسه و لا لا هو يدفع الفلوس و بس

طب هل دي تبقي عيشه يا شيخ انت و هي لو انتوا بتحبوا بعض ليه متكملوش سعادتكم للاخر و كل واحد ينشغل عن التاني بعد الجواز

هتقولولي مشاكل ما هو كان في مشاكل قبل الجواز و كنتوا بتعدوها سوا و برده كان في وقت للحب و الرومانسيه
انا رايي لو الرومانسيه انعدمت بين المتزوجين تنعدم الحياه بينهم و ده كان موضوعي و رايي فيه و مستنيه اراءكم

لا موضوع جامد ياسويت بس ربنا ميكتبش علينا الحياه دى انا كده اتعقد

بجد موضوع جامد
تسلم ايدك يا قمر

هههههههههههه

موضوع جامد بس علشان تعرفوا ان السبب فى البنات

الواد احمد ياعينى طلع عينه ولا عارف يفطر ولا يخرج ولا يعمل اى حاجة ههههه

الله يكون فى عونا

الموضوع حلو و عصري بس البنات مش زي بعض والاولاد برده واكيد هو اللي وصلها لكدة ماشى يا مستر sky thunderعلي العموم اختلاف الرأى لا يفسد للود قضيه ولك منى احلى سلام علشان تعرف ان قلبنا طيب. سيف

مرسى كتير ياadminبجد دمك خفيف

هو الموضوع ده ايه الفكرة منه انا مش فاهم منه حاجة يعنى هو مين احمد ومين منى ومين على ومها دول دول معانا فى الكلية ولا دى امثلة بتشتغلونا بيها

Akilis.st.betesburg كتب:: هو الموضوع ده ايه الفكرة منه انا مش فاهم منه حاجة يعنى هو مين احمد ومين منى ومين على ومها دول دول معانا فى الكلية ولا دى امثلة بتشتغلونا بيها

اولا اهلا بيك يا باشا منور المنتدى

لا ده امثله مش اكتر .... من غير اشتغالات ولا حاجه

نورت مره تانيه