اشمعنى بالانجلش يعنى .!!

No Dear ,I'm Speaking English ,Write It ,

Read with It

I'm Really Lovin It

طبيعى تسمع الجملة دى من اى شاب اجنبى الانجلش هى لغته الأم

لكن لما تبدأ تسمعها وتعيشها مع ناس

كانت ف يوم من الايام بتقف طابور الصبح

تقول بلادى .. وف شنطتها سندوتشات اللانشون والرومى

وساعات بيض مسلوق

وبتروح لأهاليها هدومها غرقانه تباشير .. باختصار كان طالب مصرى

فصله كله ولاد مصريين .. عاوز اوصل انى أسأل سؤال واحد

العربى دلوقتى مكانته فين وايه لبعض الشباب ومش بقول كلهم طبعا

البعض بياخدها روشنه واكيد هتوافقونى على كده

والبعض التانى بياخدها نوع من انواع التحذلق

وفى اللى حابب يكون كده ... براحته طبعا

وفى النوع اللى بيدعى ان علاقته بالعربى تكاد تكون صفر .. هأو

عاوز اقف مع النوع ده شوية

لانه هو اللى انا عاوز اتكلم عليه من الصبح

تخيل ام مصريه بحته فى اسره زى اسرة اى حد فينا

بتصحي اى حد فينا ..الطبيعى هتقوله صباح الخير ياحبيبى

قوم الحق صليلك ركعتين ربنا يبارك فى يومك.. ده الطبيعى جدااااا

لكن انا او انتوا مشفناش ام مصرية بتصحى ابنها

بتقوله جود مورننج هنى !!

او اى اب بيخش البيت بيقول السلام عليكم ..

مبيخشش يقول هاى جايز

انا بتكلم عن ابسط مبادئ التعامل بالعربى فى محيط اسره

يبقى ازاى اخ فاضل او اخت فاضلة يدعى

انه معدوم فكريا من ناحية العربى

مفيش مره حاول يقرى قرآن .؟؟؟ بلاش قرآن

مش بصعبها او بحول الموضوع لحاجه تانيه

مدرسش عربى فى مدارس ؟؟ مكتبش موضوع تعبير ابداااا .؟؟

عمره مااتعامل مع حد بيتكلم عربى حتى لو بقال .؟؟

اصحابه .. جيرانه .. اهله حتى ..مبيتعاملوش سوى بالعربى .؟؟

يبقى كون انه ادعى انه يجهل العربى فده .. تنصل من جذوره

كلنا بلا استثناء بنتكلم انجليش

باختلاف الفروق الفرديه بس ومستوى استيعاب

الاستماع وسرعة التخاطب وجراءة النطق مش اكتر ..

لكن ليـــــه برده بنتعامل بالانجليش .؟؟

كمثال عام وحى ولكن مش قاعدة بنيت عليها فكرتى .. الفايس بوك

انا مصرى .. انت مصرى .. او عربى او حتى من عالم ماوراء البطيخ

لكن لغتنا الام العربى .. او ده المفروض يعنى ..ليه بنلغيها ساعات .؟؟

ليه لما بحب اوصل فكره للناس مش بكتبها بلغتى .؟؟

هل مثلا احنا شايفين ان الانجليش بيعبر اقوى من العربى .؟؟

هل دى ثقافته .. هل ده اللى هو حابه .؟؟

هل عاوزين نبان قدام بعض بمستوى فكرى معين .؟؟

او اسيب انطباع غامض عنى بصفتى الرجل المثقف

ذو الحروف الاجنبى .؟؟

ياريت ندى لبعض اسباب مقنعه فعلا .. عن ان البعض راكن العربى قوى

وانا بتكلم كلام عام .. وليه برضه لاغيين نفسنا ولاغيين لغتنا كده ..

ومحدش يقول ان معرفته بالعربى صفر

.. محدش وهو صغير تيته كانت بتاخده على رجليها وتحكيلة تراث

تشارلز ديكنز وشكسبير

وكانت بتنيمه على موسيقى موتزارت وتشيكوفيسكى

ببساطه انا بتلكم عربى ..ليه لما بكلم حد زيى مبكلموش عربى .؟؟

هل وصلت بينا الثقافة لدرجة ان المعانى

بتقفز لذهنى بالمعنى الانجليزى قبل العربى .؟؟؟

حاجات كتيـــر المفروض نشرحها لبعض .. ليه بنكلم بعض انجليزى .؟

See My World !!

بجد توبيك جامد ومعاك حق فى كل كلمه فيه
احنا اتربينا ع العربى وهو لغتنا الاولى ومش معنى انى انتسب للغه تانيه انى بقيت عايش فى الحضاره والرقى وبقيت شخص وااااو يعنى
تسلم ايدك